وبدأالاستعداد للمولد ...

وبدأالاستعداد للمولد...

مولد سيدي الفالنتاين

تجري الان الاستعدادات علي قدم وساق للاحتفال بمولد سيدي الفالنتين

فقد بدأت المحلات في الاصطباغ باللون الاحمر وبدأ موسم الدباديب والقلوب

ومولد سيدي الفالنتين يهل علينا في شهر فبراير من كل عام حيث يحتفل العالم اجمع بمولد سيدي الفالنتاين

ولأننا شعب عاطفي وقلبه رهيف حبتين ولأن سيدي الفالنتين كان حد مبروك اوي وولي وليه كراماته "بغض النظر ولي لمين" يحتفل شعبنا بمولد سيدنا الولي في كل عام مرتين مره في هذه الايام ومره اخري في شهر نوفمبر

انا شخصيا مش ضد ان احنا نعمل يوم للأم ويوم للحب نهادي في بعض او حتي نفتكر بعض برساله وتكون فرصه نتواصل مع ناس الدنيا بهمومها وزحمتها بتبعدنا عنهم بالعكس شايفها حاجه كويس "بعيدا عن حكاية الدباديب والقلوب الحمرا"

انما انا اعتراضي اصلا علي المولد "كاعتراضي علي كل الموالد" وصاحبه طبعا...

ايوه انا معترض علي سيدك الفالنتين ومش خايف لتحل عليه لعنته اطلاقا...

طبعا واحد بيقرا دلوقتي بيقول سامحو يا سيدنا ده جاهل ومايعرفش

وانا مش معترض انا فعلا معرفش كتير عن سيدنا وماحبتش اصدق العيال الارهابيين مروجي الاشاعات

وما يقولونه من كلام مش ولابد عن سيدنا فدخلت ابحث عن حكايته

وأتاري قصة سيدنا كالاتي:

اختلفت الاراء حول سيدنا الفالنتاين صاحب المولد ده كاتير واختلفت القصص "والتي ترويها المواقع الاجنبية المحايدة" حول اسباب تكريمه والاحتفال بيوم خاص له

خلاص هذه القصص... ان سيدك الولي ده كان قديس مسيحي من زمان اوي "ادي أول القصيدة" 

و تضاربت الحكايات التي تروي عن سبب اتخاذه اماما للعاشقين

منها انه كان يقوم بتزويج الشباب في السر ويتمم مراسم الزواج بعيدا عن الأعين متحديا قرار الامبراطور الذي منع الزواج بين الشباب لقناعته بأثره السلبي علي الشباب كجنود في جيشه

وطبعا صاحبنا اتقفش واتعدم بقرار من الامبراطور... 

"ما لم يروا في التاريخ و انا واثق منه ان اللي عملو له العيد  الشباب اللي مالحقوش يتجوزو..اما اللي دبسهم ومات... انا عارف كويس برده راحو علي قبره وعملو ايه....!"

دي روايه...

وفي رواية اخري...ان صاحبنا لما اتقفش واتسجن...قبل الاعدام...حب بنت السجان وكاتبلها الرسايل والجوابات ...

ده غير روايات تانية كتيير اوي

خلاصتها.. ان صاحب المولد لهو ولي ولا حاجه

وان كان ولي ...وليه كرامات...فاكيد مالهاش علاقة بينا وبثقافتنا وبيئتنا علي الاطلاق

علي فكره...

في ثقافتنا وحياتنا البسيطه ايام واعياد تغنينا عن مولد سيدنا وامثاله خد عنك مثلا...

يوم الجمعة...

بوم عيد الاسرة ..."او كما كان" كل الناس اجازة, وبنفطر سوا... ويمكن ربنا يكرم بخروجه أو زيارة عائلية

أضعف الأيمان... هانتلم علي الفطار أو بعد الصلاة امام التلفاز

بلاش الجمعه, خد عندك...

الخميس الأول من كل شهر "ايام الخمسينات ةالستينات"

كان عيدا للحب ولكم بشكل شهري

يجتمع عليه كل ابناء الوطن العربي

ليلة أم كلثوم 

سيبك كم ده كله

طب ماحنا عندنا عيد حب اسبوعي متأصل في ثقافة الشعب المصري بشكل غريب

يوم الخميس ... عيد الحب الاسبوعي عند المصرين "واللي معرفش اصله ولا تاريخه في حياة المصريين بس غالبا علشان صابح الجمعه اجازه" 

خلاص ياعم ادخل علي مراتك كل يوم خميس بورده حمرا مش هاتكلفك اكتر من 75 قرش او ابعت رساله لخطيبتك او حتي زوها "وماتنساش الورده" 

وانت ياست الكل ... بدل ماتركني كل ماهو احمر لمولد الفالنتين او لماتش مصر

استخدمي كل هذا الاحمر بدرجاته في ذلك اليوم لتضفي شيئ ا من الدفء والحميميه علي حياه غلب عليها الجفاء والبرود

ولا الحوجه لسي فالنتين...!

مش عارف ليه الايه دي جت علي بالي وان باكتب:

" أولا يرون أنهم يفتنون في كل عام مرة أو مرتين ثم لا يتوبون ولا هم يذكرون" التوبة 126

اخر الكلام:

"قال رسول الله صلى الله عليه وسلم: لا تكونوا إمعة، تقولون إن أحسن الناس أحسنا، وإن ظلموا ظلمنا، ولكن وطنوا أنفسكم، إن أحسن الناس أن تحسنوا وإن أساءوا فلا تظلموا."

صدق رسول الله صلى الله عليه وسلم

روابط للمزيد من المعلومات:
http://en.wikipedia.org/wiki/Valentine%27s_Day

http://en.wikipedia.org/wiki/Saint_Valentine


http://www.history.com/content/valentine/history-of-valentine-s-day