الأربعاء، 9 مارس 2011

واحد ... اتنين ... الجيش المصري فين...؟

واحد...اتنين
الجيش المصري فين...؟

الجيش المصري في ورطه
ثورة وشعب انما لقطه
عايز يعدلها بخبطة
من غير تعب رجلين

واحد...اتنين
الجيش المصري فين...؟
الجيش المصري غلابه
وحيلته كام دبابة
ولما الشعب اتصور...
راحت الدبابة فييين؟؟

واحد...اتنين
الجيش المصري فين...؟
ده سؤال من صاحبي
دكتور ... للهم مخبي
امبارح كان في المستشفي
جم خطفوه اتنين

واحد...اتنين
الجيش المصري فين...؟
الجيش المصري في أطفيح
قاعد والوضع مريح
أصله بيبني في كنيسه
طب واللي هدمها مين؟؟

واحد...اتنين
الجيش المصري فين...؟
ودخلنا أمن الدولة
لقيناه واخدها مقاولة
ورق وشرايط اتحرقوا
ورجال الجيش صاحين...!

واحد...اتنين
الجيش المصري فين...؟
الجيش اهو عندي في موبايلي
عمال بيكتر في رسايلي
ياتري رصيده هايخلص
ويسيبنا للفاسدين...؟

واحد...اتنين
الجيش المصري فين...؟
الجيش المصري مظلوم
وبحال الشعب اهو مهموم
لكن الشعب بيسأل...
هنجيب الامن منيين...؟

واحد...اتنين
الجيش المصري فين...؟
الجيش المصري فين...؟
الجيش المصري فين...؟
ده سؤال بيدور في عقولنا
واحنا هنا قاعدين
قاعدين اهوه في الشارع
مايكل ومحمد وحسين
حارسين لكنيسة و جامع 
لامتي ... مش عارفين
وام احمد اهي صاحية بتدعي 
يارب احفظ بلدي
ردوا وقولوا... امين.