"غيبوبة سكر" تتسبب بنفوق جماعي للأسماك في مصر... حتي سمك البحر جالو السكر...!

الخبر ده قريته النهارده الصبح
وبصراحة ضحكني جدا
مش والله شماته في السمك لا سمح الله
ولا حتي من غرابة الخبر
ولا كمان بسبب تخيلي ايه اللي ممكن يعملو دكتور واقف لابس بلطو ابيض ماسك في ايده بدل سرنجة الانسولين خرطوم طويييل جاي من عربيه نقل كبيرة"زي اللي بينقلوا البنزين" بس المره دي مكتوب عليها احترس ... قابل للهبوط وبين قوسين انسولين
والدكتور ده عمال يرش في الترعه
والممرضة واقفة جانبه كل شوية تحط شريط السكر في الميه علشان تقيس السكر والاسيتون ....!
مش كل ده الي ضحكني خالص
اللي ضحكني اوي اوي
التغيرات العجيبه اللي بتحصل في البلد دي
حتي السمك جالو سكر
طب البني ادمييين سكر وضغط وقلب وسرطان و...و... و... قلنا ماشي
اهوه هما اللي ساكتين يبقي يستاهلوا
حيوانات حديقة حيوان الجيزة بتموت قلنا ممكن
اصل الحبسة تخنق برده ودول حبستهم طولت اوي
لأ وكمان غير الحبسة بيبيعو فيهم في سجنهم طب مالازم يموتوا
طيورنا جالها انفلوانزا وماعديتش عارفه تطير ولا حتي تكاكي
قلنا معلش... الدنيا وبلاويها واللي بيجرا فيها
واحنا جزء من نظام عالمي
انما حتي السمك...

والله دا كتييير...
ايه الي فاضل؟ بجد مش عارف ...اللي يعرف الدور علي ايه يوقولي

اخر الكلام:
رحم الله عمر بن عبد العزيز,عندما انتشر العدل, كان الراعي لا يخاف علي غنمه من الذئب في عهده

ده رابط الخبر:
http://arabic.cnn.com/2010/scitech/1/10/egypt.nilefish/index.html